Забраната за истакнување македонски знамиња на тенискиот турнир Австралија опен е повлечена и досега не предизвикала ефективни ограничувања, информира Министерството за надворешни работи.
Министерството, преку амбасадата во Канбера, реагирало до Министерството за надворешни работи и трговија на Австралија, како и до организаторот на турнирот, „Австралија Опен“, по што забраната била повлечена.
„Оттаму добивме уверување дека се работи за ненамерен пропуст – техничка грешка која е веднаш исправена и која не предизвикала ефективни ограничувања. Беше испратено длабоко извинување и уверување дека инцидентот нема да влијае врз силните врски помеѓу граѓаните на Австралија и Северна Македонија, кои се карактеризираат со пријателство и љубов кон спортот“, информира МНР.
Според организаторот, за време на натпреварите на трибините е дозволено да се веат само знамиња на учесниците на натпреварот, и оти за време на учеството на македонската тенисерка Лина Ѓорчевска на 9 јануари, меѓу гледачите го имало и македонското државно знаме без никакви ограничувања, информира МНР.
Турнирот во Мелбурн започна на 7 јануари, а ќе трае до 28 јануари.
На социјалните мрежи се прошири фотографија од знамињата кои се забранети за снимање од страна на снимателите на турнирот, меѓу кои беше и македонското државно знаме. Други забранети знамиња се тие на Русија, Белорусија, Палестина, Израел, Тајван, како и македонската и грчката верзија на знамето со Сонцето од Вергина.
Срѓан Стојанчов