Федерика Брињоне беше најбрза на супер велеслаломот одржан денеска во Вал д’Изер во рамки на Светскиот куп во алпско скијање, што за неа беше трета сезонска победа и 24-та во кариерата.
Италијанката најдобро се снајде на тешката патека во францускиот ски-центар и дојде до триумф со време од 1 минута, 21 секунда и 58 стотинки. Зад неа финишираше Касја Викоф Лие од Норвешка со 44 стотинки послабо време, додека трета беше Софија Гоџа од Италија.
Патеката им правеше сериозни проблеми на скијачките денеска па дури 26 не ја завршија трката од вкупно 58 стартери, меѓу кои беа и Микаела Шифрин и Лара Гут-Бехрами.
Во супер велеслалом Гоџа е лидер со 160 бодови, пред Брињоне која има 145, додека трета е Корнелија Хитер со 130. Микаела Шифрин е прва во генералниот поредок со 620 бодови, пред Брињоне, која има 557, додека Гут-Бехрами има 429.
Скијачките остануваат во Франција, но се селат во Куршевел, каде во четврток ќе се вози трка во спуст.