Илјадници луѓе загинаа по силната бура Даниел која од Балканот се префрли во Либија, предизвикувајќи разорни поплави во неколку градови. Според властите, се стравува дека бројот на загинати надминува 2.000, но илјадници се исчезнати.
Бурата Даниел го зафати копното во неделата, поради што властите прогласија екстремна вонредна состојба. Седум припадници на либиската армија исчезнаа за време на тековните спасувачки напори. На истокот од земјата е воведен полициски час, училиштата се затворени, исто како и продавниците. Најпогодени се градовите Бенгази, Сус, Дерна и Ал-Марџ.
Во градот Дерна, каде живеат 100.000 жители, се урнаа две брани, потопувајќи голем дел од областа при што многу луѓе се удавени. Градот е прогласен за „град на катастрофа“.
Куќите во долините се однесени од силни струи од кал кои носеа возила и остатоци.. Телефонските линии во градот исто така се во прекин, што ги отежнува напорите за спасување.
Властите соопштија дека не ги предвиделе размерите на катастрофата, и поради тоа земјата не била подготвена да се соочи со временска непогода од овие размери, поради што не биле навремено евакуирани луѓето.