Претпоследниот ден на Светскиот шампионат во атлетика мина во знакот на двојната победа на американските штафети 4 пати по 100 метри, но на второто злато за атлетичарката од Кенија, Фејт Кипјегон.
Во женската штафета Ша’Кари Ричардсон, Тамари Дејвис, Тваниша Тери и Габриел Томас убедливо беа побрзи од конкурентките од Јамајка и на крајот триумфираа со време на нов рекорд на шампионатите.
Ноа Лајлс го освои и третото злато во Будимпешта откако заедно со Кристијан Колман, Фред Керли и Брендон Карнс беа доминантни во однос на конкуренцијата и до најсјајното одличје стигнаа надминувајќи ги штафетите на Италија и Велика Британија.
По победата на 1500 метри, Кипјегон беше најбрза и во трката на 5000 метри. Таа до вториот златен медал стигна пред Сифан Хасан и сонародничката Беатрис Чебат.
Арман Дуплантис го одбрани тронот од Јуџин и го освои првото место со скок од 610 сантиметри, а имаше и три неуспешни обиди да стигне до нов светски рекорд од 6,23. Втор е Ернест Џон Обиене од Филипини, а третото место го поделија Куртис Маршал од Австралија и Американецот, Крис Нилсен.
Титулата ја одбрани и Чејс Или од САД во фрлање ѓуле, таа триумфираше пред Канаѓанката Сара Митон и поранешната двојна светска шампионка, Гонг Лијао од Кина.
ФОТО: Игор Паневски
