Со самолеплива лента на рацете, колената и стапалата ги врзувала за столица и за креветчињата во кои спиеле. Триесет и четиригодишна мајка, како во тежок психолошки трилер, се изживувала врз своите малолетни деца, на возраст од четири и шест години. И онлајн разговорите со вонбрачниот партнер, завршувале со терор. Без никаква причина, агресивно и неконтролирано ги удирала по кревките детски тела.
„На 7 мај, при вршење семејно насилство, обвинетата телесно ги повредила своите деца. Додека остварувала видео повик на социјална мрежа со нејзиниот вонбрачен пратнер, видно вознемирена, започнала без никаков повод и причина да ги удира децата по нивните тела, со што им нанела телесни повреди – набиеници и подливи“, се наведува во соопштението на Јавното обвинителство.
Освен што трепеле физичко насилство, децата биле и под постојан психолошки терор. Монструозната мајка била особено агресивна со помалото дете, кое и физички и емоционално, значително заостанувало зад неговите врсници.
„Со помалото дете комуницирала манифестирајќи вербална и физичка агресивност и не покажувала грижа за подобрување на неговата состојба, иако вештачењата извршени по наредба на јавниот обвинител утврдија дека станува збор за социјално и емоционално запуштено дете со психомоторната и психосоцијалната зрелост под неговата реална возраст“, додаваат од обвинителството.
Гостиварката со живелиште во Скопје, ќе одговара за телесни повреди, запуштање и малтретирање на дете. Надлежниот јавен обвинител од Основниот кривичен суд Скопје бара продолжување на мерката притвор.
Ова е само еден во низата потресни случаи во кои жртви се најмладите. Пред неколку месеци, 16-месечно бебе од Струга заврши со тешка повреда на главата и со скршеници на градите и на едната рака, откако врз него паднало парче мебел. Случајот доби нова димензија, кога лекарите открија и постари хематоми.
Неодамна кривична заработи и 22-годишна мајка од Кочани. Го оставала своето малолетно дете дома без никаков надзор и грижа. Повеќепати било затекнато и само на улица, без соодветна облека.
Весна Јовановска Дојчиновска