„Роња, ќерката на ограбувачот“, работена по текст на Астрид Линдгрен, во режија на Јакуб Максимов, а во продукција на Театарот за деца и младинци е прогласена за најдобра претстава во завршницата на 31 „ Которски фестивал на театри за деца“. За наградата одлучуваше жирито на град Котор, кое во одлуката вели дека во претставата била прикажана „компактна игра и синергија на актерите,куклите и музиката“.
Претставата премиерно беше изведена на 26.12.2022 година, а веќе во мај годинава се закити со награди на ,,Новосадските театарски игри”, освојувајќи Grad Prix за најдобра претстава, а награда за најдобра анимација на кукли доби актерката Матеа Јанковска, која ја игра насловната улога. За ликот на Роња, Јанковска беше наградена за актерско остварување и на Меѓународниот куклен фестивал „ Златна искра“, што се одржа во Крагуевац, а Лазар Новков за музиката во претставата доби награда на истиот фестивал. Матеа Јанковска освои награда за млада актерка за ова остварување и на годинашниот МТФ „ Војдан Чернодрински“ во Прилеп.
Покрај Матеа Јанковска, во оваа куклена претстава настапуваат : Никола Наковски, Ангела Димитрова, Мики Анчевски, Петар Стојанов и Катарина Илиевска – Силјановска.