Американските разузнувачи имале прецизни информации за саботниот бунт на Евгениј Пригожин против руските власти и точно знаеле каде и како ќе напредуваат единиците на „Вагнер“, објави „Си-Ен-Ен“. Притоа се наведува дека САД не сакале да ги споделат таквите разузнувачки податоци со сите сојузници на НАТО, освен високи британски службеници кои имале увид во документите. Извори за „Си-Ен-Ен“ рекоа дека не било јасно кога точно Пригожин ќе делува, но како можна причина за бунтот ја наведуваат изјавата на руското Министерство за одбрана од 10 јуни во која се порача дека сите приватни воени компании, вклучувајќи го и „Вагнер“, ќе мора да потпишат договори со руската војска.
Разузнувачките податоци во САД биле толку тајни, па затоа се насочувале само кон највисоките службеници во администрацијата, како и кон осум конгресмени кои имаат пристап до најчувствителни прашања, додаваат извори за „Си-Ен-Ен“.
Стејт Департментот негира каква било вмерашност на САД во вагнеровиот план.
Рускиот претседател Владимир Путин, пак, ги обвини западните лидери за бунтот на Вагнер чија цел била да ја видат Русија задушена во крвави судири. Во петминутното обраќање до нацијата, тој вети дека организаторите на бунтот ќе ги изведе пред лицето на правдата. За дел од војниците на „Вагнер“ рече дека се „патриоти“ на кои ќе им биде дозволено да се приклучат на армијата, да одат во Белорусија или да се вратат дома и ги ослободи од одговорноста.
Белоруските медиуми, пак, утрово објавија дека Евгениј Пригожин е виден во хотелот „Грин Беј“ во Минск. Официјална потврда на таквата информација, сепак, нема, како што нема дека лидерот на „Вагнер“ е воопшто во Белорусија, земја која официјално беше соопштена како негова дестинација по договорот со претседателот Александар Лукашенко во неделата.
Сашко Димовски