Зад овие ѕидини владее мир, вели надлежната управа и директорот на најголемиот затвор во земјава. Но, кој се грижи за редот на над 1.000 тешки осуденици е проблем за кој сè уште нема системско решение. Безбедносни причини и недоволен број на затворски чувари беа причините владата пред две недели да прогласи кризна состојба и координацијата да ја предаде во раце на Стојанче Ангелов, директорот на Центарот со управување кризи (ЦУК), а се обврза дека итно ќе вработи нови затворски чувари.
Тој на располагање ја доби војската и полицијата, но раководењето со затворските работи остана во надлежностите на затворската служба. На „Идризово“ му недостигаат 100 затворски чувари, чие вработување сега е заглавено во министерството за финансии. Се чека потпис на министерот Фатмир Бесими. Откако ќе се обезбедат потписот и средствата, ќе се објави оглас, а 100-те избрани кандидати веднаш ќе добијат решение за вработување. Нивниот паралелен процес на обука и работни задачи ќе трае најмалку четири месеци, пред да се осамостојат во работата.
Владата засега не открива колку долго војници ќе ги чуваат затворениците, а ќе помагаат полицајци. Од кризниот штаб брифираат дека кризната состојба дава резултати – бегства нема, нема и дрога и алкохол заради засилената контрола, а внатре се води и борба за искоренување на корупцијата која со децении царува во во најголемиот затвор во армијата, нешто што е забележано во сите извештаи на надлежните.
Стравувањата се дека приливот од надвор на супстанци и забранети предмети претстаува безбедносен ризик, кој се следи со помошта на триото чувари, полиција, армија. Црвениот аларм за интервенција „Идризово“ не успеа да ја вклучи народниот правобранител, а тоа го сторија затворениците.
Повеќекратниот убиец Беким Мемети разоружа четворица затворски чувари во затворско комбе со врзани раце, пукаше и рани еден и избега. Друга група со месеци копала и опремувала тунел за бегство. И двата случаи се отворени истраги во обвинителството за организиран криминал, но засега разрешница сè уште нема.
Павле Беловски