Да не се минува мостот кај село Пчиња оти е со слаба конструкција и наскоро ќе дојде до зголемен притисок поради зголеменото ниво на водостојот на Крива Река кој ќе дојде и до реката Пчиња, па постои опасност од негово уривање, преедупреди Центарот за управување со кризи (ЦУК).
Од таму укажуваат на внимателност и при движење покрај речните корита и поројни суводолници, особено во реони на поројни поплавувања, бидејќи се очекуваат локални кратки но поројни дождови.
По информацијата од Управата за хидрометереолошки работи за зголемен водостој на локалните реки и на реката Вардар се преземаат превентивни и координативни мерки.
Конкретно беше известено дека заради зголемен водостој на реката Вардар во горниот дел од текот, на сливовите со одредени притоки, се можни излевања во Полошката Котлина, Тетовски-Гостиварскиот регион, потоа во сливот на реката Лакавица и на други критични места во горниот дел од сливот на реката Вардар.