Поплавени домови, улици, автомобили. Градежната механизација утринава работеше на расчистување на калта и наносите од камења и предмети по улиците. Жители на Делчево ги расчистуваат штетите по дворовите и во куќите, каде што им влегла вода. Семејството на Самика Фејзулова и нејзините соседи ја изнесуваа покуќнината и електричните апарати на долните катови ги изнесуваат. Штетите се големи, а какошто велат за нив нема сон.
Најголемите штети по домовите се во населбите Пролет и Басарица, има уништено улици, автомобили.
Екипи на ЈКП „Брегалница“ и на ТППЕ Делчево интензивно работеа на санирање на штетите од вчерашнпото невреме што го зафати Делчево. Се проценува дека штета има на околу 50 објекти. Според граѓаните не е само дождот виновен за елементарната непогода, туку и неисчистените каналите во кои се влева атмосферската вода.
Градоначалникот Трајковски изрази благодарност до противпожарните единици од Кавадарци, од Берово, од Пехчево, од Македонска Каменица, од Виница и останатите кои учествувале и се понудиле да помогнат. Водоснабдувањето е нормализирано, така што граѓаните можат да ја користат водата за пиење. На вонредната седница на Советот на општината едногласно е одлучено да се прогласи елементарна непогода, комисиите излегуваат веднаш на терен.
Викторија Јованова