И покрај дождливата вечер, отворањето на 51 „ Мајски оперски вечери“, вчера, покажа дека за поклониците на оперската уметност не постојат пречки. Пролетниот дожд ги натера организаторите на фестивалот свеченото отворање со говори и традиционално палење на фестивалскиот оган (овој пат од маестро Томислав Шопов), да го направат внатре во објектот на нашата Национална опера и балет. А, љубителите на операта во свечени вечерни тоалети и костуми на кои доминираше црната боја дојдоа уште пред официјалниот почеток во 20 часот, полека исполнувајќи го фоајето. Припадници од јавниот и културниот живот доминираа на отворањето на „ Мајските оперски вечери“, а политичари речиси и да немаше.
По поздравниот говор на директорот на НОБ, Васко Ристов и отворањето на фестивалот од страна на министерката за култура Бисера Костадиновска Стојчевска, публиката се упати во салонот, за да присуствува на премиерата на операта „ Набуко“, од италијанскиот композитор Џузепе Верди“. Токму овдека се виде дека оперската уметност во Македонија има верна публика зашто беше исполнето секое седиште, до последниот ред. И тоа не е куриозитет за годинава, туку вообичаена слика со години на назад, кога се работи за „ Мајски оперски вечери“. Особено радува што меѓу верната публика има многу млади луѓе , што значи дека фестивалот успешно регрутира гледачи за во иднина.
Инструменталот од познатиот „ Хор на Евреите“, во воведот на изведбата на „ Набуко“, само ја навести вредната и со многу емоции зачинета музичко- сценска изведба која претстоеше, а на крајот беше наградена со громогласен аплауз од публиката која остана во салонот на НОБ повеќе од 3 часа. Заслуга за тоа има целиот уметнички ансамбал, од домашните солисти чии моќни и сугестивни гласовни можности одговорија на барањата на Верди, преку хорот, до сценското обликување на просторот и костимите. Иако дејствието во „ Набуко“ не враќа во 587 година пред новата ера во Ерусалим и Вавилон и раскажува за покорувањето и прогонството на Евреите од нивната земја, од страна на вавилонците,, тимот од Италија составен од Флавио Арбети како сценограф и Артемио Кабаси како костимограф , под режисерската палка на Ренато Бонајуто, даде свеж печат на класичното обликување на операта „ Набуко“, која претходно на нашата оперска сцена е поставена во 2003 година. Во македонско- италијанската слика за квалитетна соработка се вклопува и несебичниот ангажман на маестро Даниеле Аџиман, кој застана зад диригентскиот пулт, пред оркестарот на НОБ.
„ Мајските оперски вечери“ годинава се посветени на 210 годишнина од раѓањето на Џузепе Верди. Затоа неговото творештво доминира во програмата на ова фестивалско издание. Покрај „ Набуко“, ќе бидат изведени оперите „ Травијата“ и „Аида“, која традиционално ги затвора „ Вечерите“. А, специјално за чествувањето на годишнината на Верди, на 26 мај ќе биде изведен неговиот „ Реквием“, со учество на оркестарот на нашата Филхармонија, хорот на НОБ, под диригентската палка на Емил Табаков од Бугарија и солисти од Македонија, Косово и Србија.
По премиерата на „ Набуко“, следна содржина на фестивалот е балетот од класичниот, „ железен“ репертоар – „ Лебедово езеро“, на музика од Петар Илич Чајковски. Ќе биде изведен на 12 мај , со учество на солисти од Италија и Унгарија. Но , за оваа изведба , како и за „ Набуко“ синоќа, билетите се одамна распродадени. Тоа го потврдува интересот на публиката за трајните вредности, што ги афирмираат „ Мајските оперски вечери“.
Сотир Трајков