Здружението на џез музичари на Македонија в недела – 30. април организира целодневен џез хепенинг „ Today it’s all about jazz“, во паркот „ Ибни Пајко“ , по повод прославата на Светскиот ден на џез музиката. Како што кажаа организаторите на денешниот прес, програмата ќе започне во 13 часот со работилница на која деца од 4 до 11 години ќе учат за џез музиката од пијанистот и композитор Гордан Спасовски. Тој ќе ги запознае со инструментите и со начинот како се создава џез композиција, која ќе биде изведена пред публиката. Потоа ќе настапи младинскиот џез состав , во кој членуваат Петар Марков на гитара, Давид Ѓоргиев на тапани и Симеон Будро на бас.
Официјално, програмата за возрасната публика започнува во 15 часот и ќе трае до полноќ, а вклучува домашни и странски изведувачи. Ќе настапат : Филип Динев Три со Тилман Обербек на контрабас и Јан Цајмец на тапани и перкусии, новиот скопски квартет Акварела, квартетот на Никола Бочваров кој ќе го изведе новиот албум „ Гласна тишина“, триото на словенечкиот џез музичар Јуре Пукл со мултиинструменталистот Марко Црнчец и Крис Смит, нигерискиот пејач, гитарист и композитор Адедеџи, во придружба на македонски музичари и Биг Бенд Оркестарот на Здружението на џез музичари на Македонија. Тие ќе се претстават со нови аранжмани на нумерите од Френк Запа.
- Да се свири Френк Запа е најадекватно во овој миг и ќе биде фантастично доживување за публиката, рече претседателот на ЗЏМ, Гоце Стевковски.
Определбата за годинашната програма за џез хепенингот , е да бидат застапени што е можно повеќе македонски музичари кои се активни и работат на нивен музички материјал, или свират надвор од Македонија, а било посветено сериозно внимание на квалитетот на изведувачите, иако дел од нив не ѝ се познати на јавноста, кажа Стевковски.
- Оваа година имаме сериозна редица музичари, така што тие граѓани што ќе не посетат и ќе бидат присутни ќе имаат шанса да уживаат во овој избор што го направивме за ова седмо издание, рече Стевковски.
Според музичарот и композитор Џијан Емин, на музичарот Адедеџи од Лагос- Нигерија му бил инспирација неговиот сонародник Феми Кути. Дел од Биг Бендот на ЗЏМ работел еден проект со Кути и со нашата Филхармонија во 2018 година и соработката им останала во убаво сеќавање , а доминирал афро битот.
— Но, кај Адедеџи тоа е малку проширено со џез, фанк и со текстови кои зборуваат за потребата за правда, која што овие денови е повеќе од неопходна за сите нас, кажа Емин.
Соработката на ЗЏМ со Адедеџи е резултат на учеството на нашите џезери на Конференцијата во Софија минатата година, како членка на Европската џез мрежа.
Меѓународниот ден на џезот е прогласен 2011 година од УНЕСКО, со цел истакнување на џез музиката и нејзината дипломатска улога за обединување на луѓето во сите делови на светот. Идејата за востановување на 30. април за Светски ден на џезот потекнува од џез- пијанистот и амбасадор на добра воља на УНЕСКО, Херби Хенкок.
Сотир Трајков