Американскиот актер со српско потекло Џек Димиќ со монодрамата „Ој, животе“ ќе настапи на 5 мај во Драмски театар – Скопје.
Монодрамата е работена по текст на Јосип Пејаковиќ, а Димиќ со години со успех ја игра. Станува збор за силна трагикомична драмска приказна која изобилува со црн хумор. Џек Димиќ ја адаптирал, режирал и го толкува ликот кој на босански јазик на емотивен и духовит начин ја раскажува неговата вистина.
- Монодрамата „Ој, животе“ е приказна за човек кој доброволно оди на издржување на затворската казна наместо неговиот помлад брат кој е сторител на убиство со умисла. Протагонистот на оваа монодрама на извонреден комедиографски начин ја раскажува својата мака и многу емотивно одново ги преживува сите случки низ кои поминал за време на издржувањето на казната, стои во соопштението од Драмски театар.
Џек Димиќ е еден од најпознатите актери од регионот покрај Раде Шербеџија и Горан Вишњиќ кој постојано има ангажмани во холивудските серии и филмови. Димиќ остварил над 85 филмски, телевизиски и театарски улоги. Освен на англиски јазик, тој игра улоги на српски, руски, чешки и италијански јазик. Во Холивуд играл во популарните ТВ серии „Ред и закон“, „Место на злосторот“, „Црна листа“, „Замок“, „Сина крв“, како и во сериите што во последните години се снимаат во регионот „Државен службеник“, „Ургентен центар“, „Воена академија“, „Клан“, „Династија“, „Вера“ и многу други. Џек Димиќ го играл научникот Никола Тесла во филмот „Народот на Тесла“, кандидат за Оскар за долгометражен играно-документарен филм во 2020 година.
Гостувањето на Димиќ е овозможено со лична заложба на Н.Е. Драган Јаќимовиќ, амбасадор на Босна и Херцеговина во нашата земја.