Селекторот на македонската ракометна репрезентација Кирил Лазаров го скрати списокот на ракометари повикани за последните два натпревари од евроквалификациите со Луксембург и Турција.
На скратениот список на Лазаров се најдоа 21 ракометар, кои ќе конкурираат за настап на двата дуели закажани за идната недела. За разлика од мартовските квалификации со Португалија, сега во тимот се враќаат вардаровите играчи Филип Талески и Гоце Георгиевски, кој се очекува да ги одигра последните два натпревари во својата репрепрезентативна кариера.
Од претходниот собир ќе ги нема повредените Мартин Велковски и Иван Џонов, а во конкуренција не е Марио Танкоски. Во националниот тим по подолго време повик доби и пикерот Михаил Аларов.
Тимот повторно ќе биде предводен од стандардните Никола Митревски и Мартин Томовски на голот, потоа Филип Кузмановски, Жарко Пешевски, Томислав Јагуриновски, Никола Митревски, како и помладите Марко Митев, Игор Ѓоргиев, крилата на Е. Пелистер, Ненад Костески и браќата Атанасијевиќ.
Првиот собир на репрезентацијата е закажан за во недела, а прво гостуваме кај Луксембург на 26 април, а потоа во последното коло на 30-ти април ја пречекуваме Турција. Со две победи го обезбедуваме второто место на табелата и пласманот на Европското првенство во Германија идната година.
