Во Македонија е нормално да те тепаат, да те пцујат и да те стрелаат затоа што си Бугарин, додека полициајта ништо не презема, тврди Христијан Пендиков, во ексклузивно интервју за бугарската БТВ, каде исто така рече и дека во Македонија се учи лажна историја, која шири омраза кон сите соседни народи и особено кон Бугарија.
Ние учиме историја според која само Србите ни се браќа, а сите останати ѝ посакувале само лошо на Македонија, вели Пендиков.
Пендиков, кој дури пред само неколку години се освестил како Бугарин, тврди порано бил македонист и не ги сакал останатите балкански народи.
За да бидеш македонски Бугарин, едноставно треба да се освестиш. Во Македонија учиме променета, лажна историја, во која Бугарите се фашисти, татари. Откако прочитав светска историја, откако прочитав за ВМРО и каква е историјата, се освестив, тврди Пендиков
Вели дека тој Неговиот сон бил еден ден да се врати во Македонија и слободно да се изјасни дека бил Бугарин.
Сонувам еден ден да се вратам во Македонија и слободно да кажам дека сум Бугарин, и никој ништо да не ми направи. Не само мене, туку и на сите кои живееме во Македонија и кои сме македонски Бугари.“
Зборуваше и за нападот, и според него додека бил во локал со неколку пријателки, му пришле три лица кои започнале да го навредуваат затоа што бил Бугарин, дека бил предавник и дека требало да си замине од Македонија. Кога тргнал да си оди од локалот, од зад грб го нападнале три лица и 10 минути го клоцале додека лежел на земја. За бугарската телевизија Пендиков тврди и дека сѐ уште добива закани, и дека од нив не е поштедена ниту мајка му.
На 22 годишниот освестен Бугарин, чие претепување во Охрид дополнително ги влоши односите меѓу Македонија и Бугарија од бугарскиот државен врв му беа понудени серија бенефити, откако заврши неговото лечење на Воено-медицинската академија во Софија, затоа што достојно го одбранил своето бугарско име. 22-годишното момче ќе добие бесплатно сместување во стан во Софија, паричен надоместок за да живее таму со својата мајка, но и забрзување на постапката за стекнување со бугарско државјанство. Поради заканите кои ги добивал, веќе му е доделено и полициско обезбедување.