По само десетина дена градоначалничката на Париз, кој е домаќин на следните Олимписки игри, Ан Идалго го смени ставот околу евентуалниот настап на спортистите од Русија и изјави дека тие не можат да партиципираат на најголемото натпреварување се додека трае војната во Украина.
“Не сум за опцијата спортистите од Русија да настапат како неутрални. Тоа е многу нечесно. Не сакаме да ги видиме на дефилето за време на церемониите на свеченото отворање и затворање на Игрите. Тоа е земја која нападна друга држава и не смееме да се преправаме дека тоа не се случува”, рече Идалго.
Руските спортисти на последните две Олимпијади во Токио и Пекинг настапија како неутрални. Поради санкциите изречени од страна на Интернационалниот олимписки комитет поради непочитување на правилата за допинг контроли тие на борилиштата се појавија без национални одбележја, а ако се качија на подиумот не се интонираше химната на Русија.
ИОК смета дека Русите треба да го задржат статусот на неутрални и да им се дозволи да бидат дел од големите натпреварувања преку кои ќе обезбедат норми за учество на Олимписките игри.
Руските национални спортски асоцијации поради инвазијата врз Украина од март минатата година се суспендирани од сите натпреварувања, а доколку се прифати сугестијата на ИОК тие повторно би се вратиле на борилиштата.