Неофицијално, во наредните денови Димитар Ковачевски и Арбен Таравари ќе имаат уште една средба. Тогаш веројатно ќе се отвори темата за проширување на Владата, што, и покрај бројните шпекулации, не била разговарана вчера, како што тврдат обајцата. И денеска, премиерот објаснува дека се разговарало за европската иднина на земјата и 130-те блокирани закони во Собранието.
И Алијанса тврди дека `се уште не добила покана за влез во Владата. Ги нарекува шпекулации информациите дека тројцата главни коалициски партнери: СДСМ, ДУИ и Алтернатива ќе `и отстапат по едно министерско место. Наводно, се разговара за ресорите здравство, правда, образование, земјоделство и животна средина. Алијанса веќе го подготвува својот список на услови, меѓу кои – да нема парламентарни избори пред 2024-та и да има автономија во одлучувањето.
Наредниве денови, Ковачевски ги продолжува поединечните разговори со партиите, што ги нарекува „продолжение на лидерската средба“. Негов нареден соговорник е Павле Трајанов од Демократскиот сојуз, а темата е иста и поврзана со европската агенда. За сите меѓулидерски разговори, на дневна основа ги информирал ДУИ, ЛДП, НСДП и сите коалициски партнери.
Соња Николовска
