-Како што ветив, отвораме процес на широки консултации. Денес во 11:00 часот во Владата ќе се одржи средба на лидерите на партиите од владината коалиција на која ќе се разгледува предлогот на француското претседателство. Веднаш по средбата, предлогот во интегрална форма ќе го објавиме на официјалната веб страна на Владата, соопшти премиерот Димитар Ковачевски на својот ФБ профил.
Според првичните информации, предлогот на веб страната на владата ќе биде поставен во 11:30 часот.
Во текот на денот, покрај средбата со коалицијата, ќе се одржат низа консулатации и разговори со експертската и стручната јавност како и медиумите.
-Како што веќе најавив вчера целиот процес ќе се одвива транспарентно, а јавноста во детали ќе биде запознаена со сите следни чекори, напиша Ковачевски кој повика “на одговорност од сите релевантни чинители во општеството, шпекулации за важни државни и национални прашања не одат никому во прилог.”
Премиерот апелира до сите политички актери и медиумите да се потпираат на официјалните информации од институциите и побара “конструктивност и поддршка од сите чинители за да донесеме мудра одлука во интерес на сите граѓани.”