Европската комисија му препорача денеска на Советот на Европа да ѝ додели кандидатски статус на Украина. Препораката, која беше очекувана и најавена, дојде еден ден откако лидерите на трите највлијателни земји во унијата, во посета на Киев изразија поддршка за европските аспирации на земјата. Западните медиуми веднаш оценија дека членството во унијата која беше создадена за да го оддржува мирот во Европа носи длабока симболика за земјата која речиси четири месеци се бори за својот опстанок.
„Сите знаеме дека Украинците се подготвени да загинат за европската перспектива. Ние сакаме заедно со нас да го живеат европскиот сон“, изјави претседателката на Европската комисија, Урсула фон дер Лајен.
Но, иако ниту една земја до сега гласно не изразила противење на европскиот пат на Украина, многу од нив имаат забелешки за скратениот пат по кој земјата добива кандидатски статус, и импликациите кои ваквата одлука ќе ги има за останатите земји кандидати, кои за истиот статус работеа со години. Сепак, комисијата тврди дека за Украина, ќе важат истите правила како и за останатите аспиранти.
„Имаме една јасна порака. Да, Украина заслужува европсак перспектива. Да, Украина заслужува да биде прифатена како земја кандидат. Ова доаѓа по препознавањето на до сега добро завршената работа, но исто така сѐ уште ни претстои важна работа. Целиот процес е заснован на заслуги, значи ќе се оди според прописите и напредокот ќе зависи исклучиво од Украина“, рече фон дер Лајен.
Русија веднаш ја обвини ЕУ дека е подготвена да ги погази сопствените принципи за сметка на нејзините геополитички интереси.
„Не знам на Украина дали ќе ѝ биде даден патоказ за да се подготви за членство. Ова може да значи само едно, дека ЕУ е подготвена повторно да ги затвори очите пред сите свои критериуми кои отсекогаш важеле за кандидатите, и е подготвена да биде водена исклучиво од геополитички интереси“, изјави рускиот министер за надворешни работи, Сергеј Лавров.
Покрај Украина, препорака за кандидатски статус доби и Молдавија, а двете препораки ќе бидат разгледани од Советот на ЕУ за време на самитот идната недела. Грузија, која се надеваше дека заедно со Украина и Молдавија ќе го фати европскиот воз, придвижуван од рускиот притисок, доби само потврдување за европската перспектива, а прашањето за кандидатскиот статус ќе биде дополнително разгледано во иднина.
Игор Трајков