Финска без одлагање треба да аплицира за членство во НАТО, порачаа денеска претседателот Саули Нинисто и премиерката Сана Марин. Одлуката, дали Финска официјално ќе побара членство во алијансата ќе биде соопштена во недела, откако претходно ќе биде разгелдана од парламентот. Финска дели 1.300 километри долга граница со Русија, и досега евентуалното членство во НАТО не беше сериозно разгледувано во Хелсински, за да не го антагонизираат својот сосед.
Нема шанси за враќање на статус квото кое го имавме пред 24 февруари. Финската филозофија беше да се обидеме и одржуваме добри односи со Русија. Тоа беше еден дел од нашата безбедносна политика, оценува Хели Хаутала, политичката аналитичарка во Центарот за нова американска безбедност во Вашингтон.
Но, по инвазијата на Украина подршката за членство во алијансата драстично се зголеми.
Силната поддршка на јавноста беше искажана низ опширни анкети. Потоа следуваше темелно разгледување, и одлуки на финските политички партии. Всушност, речиси сите партии веќа имаа одржано состаноци за НАТО прашањето изминативе месеци, изјави финскиот министер за надворешни работи Пека Хависто.
Покрај Финска, на истиот ден одлука дали да побара членство во НАТО ќе објави и Шведска. Москва веднаш обвини дека потегот претставува закана за Русија, а портпаролот на Путин, Дмитриј Песков, изјави дека нивниот одговор ќе зависи од начинот на распоредување на новата воена инфраструктура во Финска.
Постојано повторувавме дека проширувањето на НАТО и приближувањето на воената инфраструктура на алијансата кон нашите граници, не го прави светот, а уште поважно и нашиот европски, авроазиски континент, постабилен и побезбеден, обвини песков.
Песков исто така објави дека Путин веќе наредил зајакнување на одбранбените способности на западните руски граници. Но, финскиот претседател негира дека приклучувањето на неговата земја на НАТО, претставува закана за некој, и ја обвини Москва дека со нејзините постапки ја приморала Финска да го направи овој чекор.
Игор Трајков