Неколку минути пред пладне денеска во двоспратен автобус „Јутонг“ кој сообраќа на линија 57 избувнал пожар, во кој за среќа нема повредени патници, причинета е само материјална штета, информираат од ЈСП – Скопје.
Во моментот на опожарувањето, автобусот бил на последната/почетната постојка во Нерези и во него немало патници. Внатрешната контрола на ЈСП Скопје веднаш излезе на терен, при што од изјавата на возачот и сведоци, констатира дека пожарот избувнал во делот каде што се наоѓа моторот. Благодарение на присебноста на возачот и неговата брза реакција, избегната е поголема штета, велат од ЈСП и додаваат дека возачот употребил два ПП апарати, а во меѓувреме интервенирало и едно противпожарно возило.
Случајот е пријавен и во МВР и во тек е утврдување на причините за настанот, посочија од ЈСП.
ФОТО: Курир
