Украинскиот претседател Володимир Зеленски на Телеграм ги покани сите пријатели на Украина да го посетат Киев, иако тоа е опасно со оглед на тоа што НАТО не прогласи зона на забранети летови над Украина.
„Ги поканувам сите пријатели на Украина да го посетат Киев. Овде може да биде опасно бидејќи нашето небо се уште не е затворено за руски ракети и авиони. Одлуката да го зајакнеме нашиот арсенал во воздухот сè уште не е донесена. Не добивме авиони. Но, очите на сите луѓе сега се насочени кон нашиот главен град, кон Украинците. Секој што е сега со нас ќе почувствува благодарност. Не само нашата, туку и благодарноста на другите народи“, рече Зеленски на Телеграм.
Тој во Киев се сретна со премиерите на Полска, Чешка и Словенија
Премиерите на Полска, Чешка и Словенија пристигнаа во Киев вчера за да му покажат поддршка на украинскиот претседател Володимир Зеленски, кој ги информираше за текот на војната со Русија по инвазијата на неговата земја на 24 февруари.
Матеуш Моравјецки, Петер Фиала и Јанез Јанша, кои во главниот град на Украина пристигнаа со воз, се првите странски лидери кои го посетија Киев од почетокот на руската инвазија.
„Вашата посета на Киев во ова тешко време за Украина е силен знак за поддршка. Тоа навистина многу ни значи“, напиша Зеленски на интернет.