Полицијата се обидува да ги најде вештите разбојници кои ја ограбиле централната кујна на детската градинка Димче Мирчев во Велес.
Грабежот е пријавен утрово, а разбојниците најверојатно „работеле“ преку цел викенд и ја однеле сета храна наменета за оброци на 1.260 деца кои се запишани во сите објекти на градинката. Го скршиле прозорецот и влегле преку магацинскиот простор во подрумот каде се сместени котлите за парно греење.
-Веднаш го исклучиле видео надзорот, со што автоматски се исклучува и алармот. Однесено е се што имало како храна за потребите на градинката. Украдени се 10 пакети зејтин, 100 килограми брашно, шекер, целата сол е изнесена, украдени се и месни и млечни производи. Од фрижидерите е украден сиот кашкавал и сето сирење и млеко, ни изјави Маја Велиновска, директорка на градинката.
Украдената стока според пресметките на градинката чини околу 50.000 денари, а дополнително ќе се пресметува и штетата од обивањето. Градинката се организирала и со брза набавка обезбедила храна за оброците на децата, ни изјави директорката Вениновска.
Полицијата го истражува грабежот.