Децениската мака ги натера жителите на Луковица сами да започнат иницијатива патот до селото од 5,5 км да се асфалира и трипати направиле проектна документација за реконструкција со нивни средства. Последниот проект во 2020 година го доставиле до Општина Желино, но се уште нема негова реализација, а одговорноста меѓу себе ја префрлаат Општината и Министерството за транспорт и врски.
Градоначалникот Блерим Сејдуи, вели дека се уште чека одговор од ресорното Министерство.
Од Министерството за транспорт и врски, пак, не информираа дека Општината доставила 6 проекти за реконструкција на локални патишта и улици, меѓу кои и за Луковица.
- Вредноста на сите доставени проекти ги надминува средствата од 742,449.00 евра што се обезбедени од Министерството за општина Желино и затоа побарано е од општината да се произнесе кои се приоритетни проекти за да може да се финансираат во рамки на нејзиниот буџет. До овој момент, општина Желино се нема произнесено и поради таа причина се уште не се вклучени во јавните повици што ги објавува Министерството за транспорт и врски.
Одобрените средства се во рамки на Проектот за поврзување на локални патишта кој е финансиран од заем од Светска банка.
- За да го добие грантот од ниво на централна власт, општината треба да предложи интервенции на патишта и да подготви проекти и овие треба да бидат одобрени од Министерството за транспорт и врски. Кога обемот на поднесените подпроекти е поголем од расположливиот буџет, Министерството ќе даде приоритет на оние со најголема корист за општината. Според нашите сознанија, овој процес на приоритизација допрва треба да се случи за општина Желино- Светска банка.
Инаку во Луковица има 75 куќи, речиси 100 домаќинства, постојани жители и викндаши.
Тетовска Луковица се наоѓа на 930 метри надморска височина, сместена на падините на Сува Гора.
Данијела Билбилоска