Министрите за надворешни работи на ЕУ вечерва ги усвоија новиот пакет санкции, насочени кон рускиот претседател Владимир Путин и шефот на руската дипломатија, Сергеј Лавров, поради одлуката за инвазијата на Украина, изјавија дипломатски извори за ДПА.
На Путин и Лавров им замрзнуваат имот, како дел од огромниот пакет договорен на вонредниот самит на лидерите на ЕУ за одговор на рускиот напад врз Украина.
Новите санкции доаѓаат покрај замрзнувањето на имотот и забраните за патување што веќе беа наметнати на високи функционери на Кремљ, а кои беа вклучени во одлуката на Русија да ги признае отцепените провинции на Украина како независни држави.
Новите ограничувачки мерки се насочени и кон енергетскиот, финансискиот и транспортниот сектор на Русија, како и забрана за извоз на критични технологии и софтвер од Европа во Русија, а ќе се воведат и визни ограничувања.
