Откако на 6-ти јануари Државниот здравствен санитарен инспекторат изврши вонреден инспекциски надзор утврдиле дека во казино во Дојран наспроти прописите за здравствена заштита, лабораторија врши ковид тестирање.
Според информациите на Телма, станува збор за казиното ДТУ Кинг Еуропе, автомат клуб Подружница Стар Дојран и за ПЗУ Елимедика плус- Гевгелија. Вонредниот надзор е извршен поради добиени информации дека во посочениот правен субјект во Стар Дојран се вршат корона тестирања.
При надзорот во казиното Кинг во Дојран е констатирано дека постои „импровизиран пункт“ лоциран на првиот спрат во административниот дел, а на таа просторија имало ознака „Covid test“. Во моментот на надзорот во просторијата затекнати биле три медицински лица во комплетна лична заштитна опрема. Во евиденцијата за тој ден биле евидентирани 7 тестирани лица.
При надзорот во ПЗУ Елимедика плус, прегледана е медицинската документација согласно законите кои се во надлежност на ДСЗИ.
По завршување на надзорите ДСЗИ донел две решенија за забрана.
За казиното ДТУ Кинг Еуропе е донесено решение за забрана за вршење на здравствена дејност спротивно на прописите за здравтсвена заштита и забрана за употреба на објект (простор) без претходна согласност или одобрение од Министерството за здравство.
Иста забрана е донесена и за лабораторија ПЗУ Елимедика плус од Гевгелија што значи дека тие не смееле и не смеат да вршат ковид тестирања во рамки на казино за кое не постои одобрение за вршење на здравствена дејност.