Суданската цивилна авијација ги суспендираше сите летови на меѓународниот аеродром Картум до 30 октомври поради демонстрациите по военото преземање во земјата.
Шефот на владејачкиот совет на Судан, генералот Абдел Фатах Ал-Бурхан, прогласи вонредна состојба и ги распушти Преодниот суверен совет и владата.
Овој потег уследи неколку часа откако војската ги уапси премиерот Абдала Хамдок и министрите во цивилната влада.
Ал Бурхан, исто така, најави суспензија на некои одредби од Уставот со кој се наведува политичката транзиција во Судан.
Според суданското Министерство за информации, војската го уапсила Хамдок рано во понеделникот, откако тој одбил да го поддржи она што го опиша како „државен удар“.
По неуспешниот воен удар минатиот месец, длабоките тензии меѓу војската и цивилната администрација избија поради неодамнешните ривалски протести во Картум.
Пред распуштањето, Судан беше управуван од Суверениот совет на воени и цивилни власти, кој го надгледуваше периодот на транзиција до изборите закажани за 2023 година, како дел од несигурниот пакт за поделба на власта меѓу војската и коалицијата Сили за слобода и промени.