Суданското Министерство за информации во понеделникот соопшти дека привремениот премиер Абдула Хамдок е во домашен притвор и дека е принуден да издаде порака за поддршка на воениот удар.
Веста дојде откако Соединетите Држави изразија тревога поради неодамнешните случувања во Судан- земја во транзиција кон демократија, процес којшто трае повеќе од две години откако поранешниот автократ Омар ал-Башир беше сменет од власт.
Министерството за информации соопшти дека војската уапсила еден цивилен член на Суверениот совет и членови на Владата и ги однела на непозната локација.
Силно вооружени трупи и паравоени сили денеска се распоредени низ главниот град Картум, ограничувајќи го движењето на цивилите.
На видео снимките од оваа северноафриканска земја се гледаат демонстрантите кои го носат државното знаме и палат гуми во различни делови на градот. Има непотврдени извештаи и за престрелки.
Телевизијата Ал Хадат со седиште во Дубаи објави за апсењето на четворица членови на владата, еден член на Суверениот совет, како и неколку партиски лидери и гувернери на суданските области.
Суданската професионална асоцијација (SPA) денеска пред „воениот удар“ повика на генерален штрајк и граѓанска непослушност.
– Ги повикуваме масите да излезат на улиците и да ги окупираат, да ги затворат сите патишта со барикади, да започнеме генерален штрајк и да не соработуваме со пучистите и да употребиме граѓанска непослушност за да се соочиме со нив – се наведува во новното соопштение.
Американскиот специјален пратеник за Африканскиот рог Џефри Фелтман рече дека Вашингтон е „длабоко вознемирен“ од извештаите за военото преземање. Шефот за надворешни работи на Европската унија, Џозеп Борел, на Твитер објави дека со „најголема загриженост“ ги следи настаните во североисточна африканска земја.
Билјана Ставрова