Турскиот претседател Реџеп Таип Ердоган потврди денеска дека наредил 10 странски амбасадори кои повикаа на ослободување на еден бизнисмен кој е во затвор, да бидат прогласени за персона нон грата.
Во дипломатијата, прогласувањето на странски претставник за персона нон грата најчесто значи дека таа личност повеќе не може да остане во земјата каде е испратен.
Претходно, на 18-ти октомври, амбасадорите на Соединетите американски држави, Канада, Данска, Франција, Германија, Холандија, Норвешка, Шведска, Финска и Нов Зеланд преку заедничка изјава повикаа на праведно и брзо решавање на случајот на бизнисменот и филантроп Осман Кавала и на негово итно ослободување.
На митингот пред своите симпатизери во градот Ескишехир, опишувајќи ја изјавата на амбасадорите како дрскост, Ердоган додаде и дека на шефот на турската дипломатија му дал инструкции веднаш да ги прогласи странските амбасадори за непосакани личности во државата.
“Се што тие велат е: ”Кавала, Кавала, Кавала, Кавала”. Кавала е турската верзија на Сорос. 10 амбасадори отидоа во Министерството за надворешни работи заради него. Каква е оваа дрскост?” – изјави Ердоган.
Осман Кавала е во затвор веќе 4 години, обвинет дека ги финансирал протестите против власта на Ердоган во 2013-тата година и за поврзаност со неуспешниот обид за државен удар од 2016-тата година.
Европскиот суд за човекови права во 2019-тата година повика на негово ослободување, тврдејќи дека неговото затворање било со цел да биде замолчен и дека не е поткрепено со никакви докази.