Заедничка декларација потпишаа денеска лидерите од Централна Европа во Будимпешта, во која се наведува дека имиграцијата не треба да биде одговор на намалениот наталитет во Европската унија. Истовремено, лидерите ја повикаа ЕУ да ја задржи семејната политика под национална јурисдикција.
Зголемувањето на бројот на деца во Европа е од суштинско значење за зачувување на европската христијанска култура и други верски традиции за идните генерации. Миграцијата не треба да се гледа како главна алатка за справување со демографските предизвици, се додава во соопштението потпишано од премиерите на Унгарија, Полска, Чешка, Словенија и Србија.
Во документот се наведува дека секоја земја-членка треба да ја обликува својата семејна политика согласно нејзиниот устав, традиција и обичаи.
Семејната политика е и треба да остане национална надлежност, се вели во соопштението.
Наталитетот во Европската унија опаѓа од 2000 година, според податоците на Евростат, со 1,53 живородени деца по жена во 2019 година, што е значително под нивото од 2,1, кое се смета доволно за да се спречи намалување на населението.