Пет илјади обучени попишувачи од утре почнуваат со посети на куќите и становите и со пополнување на пописните формулари.
Две третини од нив се вакцинирале уште пред да се пријават за оваа задача. Токму тие ќе бидат испратени кај оние граѓани кои инсистираат податоците да му ги соопштат на имунизирано лице.
Од Заводот за статистика, кој ги спроведува пописните активности, објаснуваат дека доколку попишувачот не ве најде дома, должен е да се обиде повторно.
Со посебни протоколи, ќе бидат попишани домаќинствата кои се во изолација или имаат болен член.
Ако е можно, тоа ќе се одложува до завршувањето на изолациониот период. Бројките на заболени ќе ги доставува Министерството за здравство на дневна основа.
Статистика уверува дека нема никаква опасност по здравјето на граѓаните и дека никој не треба да остане непопишан.
И Заводот за статистика и Министерството за правда уверуваат дека се е подготвено. Се уште не е утврден бројот на административци кои ќе помагаат во пописните реони во кои бројот на попишувачи е недоволен.
Пописот ќе трае до крајот на септември. За прв пат ќе се користат електронски формулари, а внесувањето на матичниот број на граѓанинот ќе отвори бази на податоци за вработување, имотна состојба, здравствено и пензиско осигурување и друго.
Првите резултати се очекуваат во јануари. Пописот како најголема статистичка операција се спроведува по 19 и пол години – лани беше одложен заради изборите, а во април годинава заради пандемијата.
Соња Николовска