На 13-ти јули почнува отстранувањето на опасниот линдан од ОХИС. Ќе се чисти и нивелира малата депонија. Министерот за животна средина Насер Нуредини најави дека тоа ќе биде процес што ќе трае цела година и ќе чини околу 8,4 милиони евра.
Планот за ремедијација на локалитетот беше одобрен во април. На меѓународен тендер беше избрана фирмата Полиеко, која треба да спроведе безбедно чистење на околу 700 тони со заштита на околината од контаминираниот воздух. Линданот ќе биде извезен во Франција а контаминираната земја во Холандија, согласно Базелската конвенција.
Малата депонија се наоѓа до оградата на фабриката Охис и булеварот „Борис Трајковски“. Се уште не се најавува чистење на големата депонија, на која се претпоставува дека има околу 40 илјади тони канцероген линдан.