Наредната недела, премиерот Заев за прв пат ќе се сретне со бугарскиот премиер Стефан Јанев. Оваа средба ќе биде дел од протоколот на донирање 50 илјади вакцини, но ќе биде искористена за да се договори средба на која ќе се разговара околу отстранување на пречките за првата меѓувладина конференција со Европската комисија. Заев верува дека овие обновени конекции со Бугарија на премиерско и на министерско ниво, ќе дадат резултати.
Министерот Бујар Османи останува на ставот дека јуни ја дава најдобрата шанса за почеток на преговори. Вели дека нашата Влада има конструктивен однос со бугарската, а, предлогот од Португалија претставува добра основа за надминување на спорот.
Османи изрази жалење што се уште немаме амбасадор во Софија, во момент кога е потребна интензивна комуникација меѓу двете влади. Но, во моментот има интензивна координација меѓу премиерот, претседателот и Министерството за надворешни работи за да се утврди кандидат кој соодветно би одговорил на својата мисија.
Данијела Билбилоска