Фотонапонски централи, гасни електрани и ветерни паркови треба целосно да го заменат производството на струја од јаглен. Тоа, според премиерот Заев, носи модернизација, инвестиции, нови работни места, енергетски развој но и заштита на животната средина. Ова е само дел од економските развојни планови на Владата за периодот 2021-2027. Премиерот промовираше неколку десетици проекти и за експресни и локални патишта, за скијачки центри на Попова Шапка и на Осоговските планини, за Клиничкиот центар во Ѓорче Петров, за еколошко согорување отпад, за откуп на домашни производи во Лидл во Скопје. Очекува вкупни инвестиции од 8 милијарди евра.
Според пресметките на премиерот, само во ТИРЗ-овие и во индустриските зони, веќе се договорени или се пред потпишување 30 нови странски инвестиции во вкупна вредност од 609 милиони евра. При презентацијата на овој интервентен инвестициски план во постковидниот период, Заев најави и формирање посебна Единица за следење на инвестицискиот процес.
Во првата половина на јуни, готов ќе биде и ребалансот на буџетот.
Заев најави дека основа за новиот буџет ќе бидат приходите кои растат, новите кредитни линии и посебната мерка на ММФ.
Соња Николовска