Гужвите во сообраќајот во Тетово станаа секојдневие. Нервозни возачи, редици автомобили. За да стигнете до посакуваната дестинација во градот потребно ви е двојно повеќе време од предвиденото. Нема и доволно места за паркирање. Дополнително се очекува зголемување на метежот во летните месеци, кога се очекува исселениците да го посетат градот, со оглед на фактот дека рестриктивните мерки се олабавија.
Новата велосипедска патека и јавниот превоз ќе го ублажат проблемот, вели градоначалничката Теута Арифи, иако автобусите кои пристигнаа пред 4 месеца, се уште стојат паркирани во кругот на пожарната. Наместо на пролет, сега се најавува дека во лето ќе бидат ставени во функција.
За немањето доволно паркинг простор решение требаше да биде изградба на катни гаражи, но и тоа е одложено. Општината го стопирала процесот на изградба на првата предвидена гаража во центарот на Тетово, бидејќи дел од граѓаните изразиле незадоволство.
Данијела Билбилоска
