Две места повисоко, но критиките остануваат. Од 92 –ро, Македонија се најде на 90-то место на индексот на Репортери без граници. Земјата е полошо пласирана од Босна, Албанија и Косово, но подобро од Србија, Црна Гора и Бугарија. 2020 е претставена како вонредна година во Македонија, во која беше распуштен Парламентот, на власт дојде техничка влада, а предвремените парламентарни избори се одложија поради пандемијата.
Според невладината организација, промените во кривичниот законик кои ги подготвува Министерството за правда би требало да донесат поголема заштита за новинарите во државата.
Организацијата за слобода на медиумите и заштита на новинарите во светот, нагласува дека ситуацијата со медиумите се влошува во сѐ повеќе земји и дека пандемијата се злоупотреби за да се ограничи работата на новинарите, а се усложни и работата на терен.
Петта година по ред Норвешка е најдобро котирана. Следуваат Финска, Данска и Шведска. На дното се Северна Кореја, Туркменистан и Кина.
Далиборка Демјанска Цветановска