Премногу е народе на Македонија, премногу е да гледаме како нашата Македонија се разградува камен по камен, им порача на своите поддржувачи лидерот на ВМРО-ДПМНЕ, Христијан Мицкоски, на вечерашниот голем протест на опозицијата пред зградата на владата.
Своето обраќање тој го започна обраќајќи им се на присутните, не од бината, туку од улицата меѓу членовите и симпатизерите, по што започна партиската химна а Мицкоски потоа ја зазема својата позиција на говорницата.
На почетокот од своето обраќање Мицкоски ја илустрираше актуелната ситуација во државата со оценката дека додека владата користи златна вилушки, народот е принуден да пребарува контејнери за храна.
„Промени мора да има. Сите ние обединети зад знамето на Македонија порачуваме дека промени мора да има“ – порача Мицкоски.
Или ќе се бориме и ќе победиме или Македонија ќе ја нема. Имаме ли избор?, ги праша своите поддржувачи Мицкоски. Тој додаде дека борбата ќе продолжи насекаде, во Парламентот, протести на улиците, во градовите и селата. Да изградиме силна држава со способна економија, ја посочи целта на својата политичка борба лидерот на ВМРО-ДПМНЕ.
Мицкоски го критикуваше и Премиерот Ковачевски и владата затоа што молчат за последниот предлог на француското претседателство за преговарачката рамка со Европската Унија и се прават дека не го ни виделе.
„Да бидеме на чисто, тоа е ништо друго, освен капитулација без одлагање. Што би се рекло бугаризација на Македонија на рати или дипломатски нокаут “ – изјави Мицкоски.