Израел гаѓаше цел во Појасот Газа како одговор на ракетен напад, соопштија рано утринава израелските одбранбени сили (ИДФ).
„Како одговор на лансирањето од Газа кон Израел, штотуку ја нападнавме фабриката за оружје на Хамас во Газа. Терористичката организација Хамас е одговорна за сите терористички активности кои доаѓаат од Појасот Газа“, напишаа ИДФ на Твитер.
Израел смета дека Хамас е одговорен за какво било пукање во Појасот Газа. Израел, САД и ЕУ ја класифицираат палестинската милитантна организација која управува со Појасот Газа како терористичка.
Израелскиот одбранбен систем „Железна купола“ пресретна ракета истрелана од Појасот Газа кон Израел во понеделникот, што е прв таков напад во 2022 година.
Во последните денови, Палестинците се судрија со израелските безбедносни сили на планината на храмот во Ерусалим. Судирите дополнително ги зголемија тензиите по зголеменото насилство во последните недели.