Сто десет илјади вакцини на „Фајзер“ набавени преку Ковакс механизмот ќе пристигнат денес во Македонија а до крајот на годината се очекува уште една пратка од 100 илјади вакцини. Минатата недела Бугарија донираше 51 илјада вакцини „Фајзер“ чиј рок истекува на 30 септември, па токму затоа тие веќе се дистрибуирани до вакциналните центри и пунктови и во моментов се користат.
Вакцините кои ќе бидат испорачани преку Ковакс Механизмот имаат рок на употреба до 31 декември оваа година. Покрај вакцините на „Фајзер“ државата располага вакцините на „АстраЗенека“ и „Синовак“
Меѓутоа бројките покажуваат дека темпото на вакцинација стагнира. Во последните два дена во просек се аплицираат нешто над 12 илјади вакцини од кои само по три илјади се први дози. Три од четири аплицирани вакцини се ревакцинација на граѓаните кои масовно почнаа да се вакцинираат по воведувањето на рестриктивните мерки.
Ковид-19 се шири меѓу учениците и наставниците, надлежните демантираат
Кога станува збор за вакцинацијата против сезонскиот грип, од здравство соопштија дека во тек е набавка на 40 илјади дози четривалентни вакцини.
Бесплатна вакцинација против сезонски грип ќе има за следните ризични групи: стари лица над 65 години, лица со хронични заболувања, здравствени работници, бремени жени, децата на возраст од 6 месеци до 5 години, велат од Министерството за здравство.
Која е точната бројка на граѓани опфатени со ризичните групи засега не е познато. Минатата година вакцинацијата против сезонскиот грип започна дури кон средината на ноември, а во првите неколку дена се аплицираа по две илјади дози дневно.
Од здравство додаваат дека останува отворена опција за набавка на дополнителни количини доколку за тоа се јави потреба.
Огнен Чанчаревиќ