По првата прес конференција на официјален претставник на македонската влада, министерот за здравство, Венко Филипче, многу малку одговори за трагедијата која се случи во тетовскиот ковид центар а се отворија и повеќе нови прашања и дилеми.
Здравствените власти претходно соопштија дека во ковид центарот биле сместени 26 пациенти, во пожарот животот го загубиле 14 лица а 12 се сместени сега на болничко лекување. Истовремено, преку социјалните мрежи се прошири информација дека меѓу жртвите во страотниот пожар животот го загубила и млада девојка која била во болницата со својата мајка и не сакала да ја остави додека се ширел пожарот. Доколку ова е точно, официјалните податоци за бројот на загинати и преживеани пациенти од ковид центарот во пожарот, математички се невозможни.
Филипче на денешната прес конференција само информираше дека во болницата покрај здравствениот персонал и луѓето кои се лекувале од Ковид, престојувале и најмалку уште две други лица, блиски роднини на пациентите, но не можеше да потврди дали некое од нив го загубило животот.
За сите дилеми и неодговорени прашања, министерот замоли да се почекаат резултатите од истрагата која е во тек а таков беше и неговиот одговор на прашањето дали размислува да поднесе оставка на функцијата. Тој изјави дека за него е тешко со зборови да ја опише болката која ја чувствува за смртта на пациентите во пожарот во тетовскиот ковид центар и додаде:
Министерот Филипче соопшти и дека починатите во пожарот биле на возраст од 29 до 79 години, додавајќи дека 12-те евакуирани пациентите се безбедни и во стабилна состојба во тетовската болница, без повреди од пожарот. Нема ниту повредени здравствени работници.
Никола Илиевски