Исламската држава на провинцијата Хорасан, е оригиналното има не терористичката организација која вчера ги изврши двата напади во Кабул. Како што сугерира и самото име, групата е огранок на екстремистичката организација Исламската држава, и како таква таа е активна на териториите на Авганистан и Пакистан.
Позната под кратенката ИД-К, западните разузнавачи предупредуваат дека оваа милитантна група е најектремна од сите џихадистички групи кои се активни во Авганистан.
Таа е основана во јануари 2015 година, во периодот кога Исламската држава беше во својот зенит, освојувајќи големи делови и Ирак и Сирија. Групата прогласи и исламски калифат, пред да биде таргетирана и речиси уништена од меѓународна коалиција предводена од САД.
ИД-К своите редови ги пополнува со борци од авганистанските и пакистанските џихадисти, и особено од разочарани талибанци, кои сметаат дека нивната организација не е доволно екстремна во своите исламистички ставови.
За колку екстремна организација станува збор кажува фактот што ИД-К ја презема одговорноста или пак ѝ се препишуваат најгрозоморните злосторства во Авганистан. Групата отворено се фали дека редовно напаѓаат училишта за девојчиња, болници па дури и гинеколошко одделение во една болница во земјата, каде наводно застрелале бремени жени и медицински сестри.
За разлика од талибанците, чии интереси се строго ограничени на Авганистан, ИД-К е дел од глобалната мрежа на Исламската држава кој изведува напади во западните земји и редовно таргетираат меѓународни и хуманитарни цели, секаде каде што ќе ги најдат.
ИД-К е базирана во источната авганистанска провинција Нагархар, во близина на криумчарските рути на дрога и луѓе од и во Пакистан. На врвот на својата моќ групата броеше 3.000 членови, но изминатава година претрпе сериозни загуби во судирите со американските и авганистанските безбедносни сили, но и со талибанците, со кои се во отворен конфликт.
Oд друга страна пак, ИД-К отворено соработува со друг афилијат на талибанците, а тоа е т.н Хакани мрежа, и според западните разузнавачки агенции, најголемиот дел од терористичките напади во Авганистан во периодот меѓу 2019 и 2021 година, се извршени од ИД-К во соработка со Хакани мрежата, но и други периферни ектремистички групи базирани во Пакистан.
И покрај периферната поврзаност меѓу талибанците и ИД-К, двете групи имаат длабоки несогласувања. ИД-К ги обвинува талибанците дека го предале џихадот и го напуштиле бојното поле за да постигнат мировен договор, „усогласен во раскошни хотели во Доха.“
Интересно е што справувањето со безбедносната закана, која неминовно ја претставува ИД-К во Авганистан, ќе може да биде првата точка на соработка меѓу западните земји и талибанците.