Комитетот за светско наследство на УНЕСКО повторно предлага природното и културното наследство на Охридскиот Регион да биде впишано на Листата на светско наследство во опасност.
Во нацрт-одлуката се наведува дека напредокот во заштитата е недоволен, а заканите за регионот и понатаму се сериозни.
Како главни проблеми се посочуваат урбанизацијата, нелегалната градба, недоволната прекугранична координација, инфраструктурните проекти и бавното решавање на проблемите со отпадните води и загадувањето.
Комитетот потсетува дека веќе неколку години предупредува на сериозните закани и оценува дека тие и понатаму ги исполнуваат критериумите за впишување на Охридскиот Регион на Листата на светско наследство во опасност.
Потребни се итни и координирани мерки, УНЕСКО бара Македонија и Албанија да подготват заеднички план со конкретни мерки и рокови за зачувување на регионот.
Конечната одлука за статусот на Охридскиот Регион треба да биде донесена на 22 јули, во рамки на 48. сесија на Комитетот за светско наследство што се одржува во Бусан, Јужна Кореја.