Еврокомесарката за проширување Марта Кос, во пресрет на нејзината посета на Скопје, порача дека Македонија покажала силни резултати во спроведувањето на реформската агенда и ја повика Владата со исто темпо да продолжи и во пристапните преговори со Европската Унија.
Таа оцени дека актуелниот момент претставува можност што се случува „еднаш во генерацијата“ за проширување на Унијата. Во интервју за МИА, Кос истакна дека напредокот во евроинтеграциите зависи од исполнувањето на преземените обврски, градењето доверба со земјите членки и одржувањето добрососедски односи.
Таа нагласи дека ниту една земја кандидат досега не добила гаранции дека во текот на пристапниот процес нема да се појават нови билатерални спорови. За време на денешната посета на Скопје, Кос ќе се сретне со премиерот Христијан Мицкоски, со вицепремиерот и министер за европски прашања Беким Сали и со претседателот на Собранието Африм Гаши.
Во фокусот на разговорите ќе бидат реформите, европската интеграција и реализацијата на Планот за раст за Западен Балкан, во чии рамки Македонија досега добила 142,1 милиони евра.
