Демократската унија за интеграција (ДУИ) реагира дека во државната делегација на Северна Македонија на Самитот на НАТО во Турција нема ниту еден претставник од албанската заедница.
Од партијата оценуваат дека тоа претставува „одраз на политички менталитет кој ја гледа државата како сопственост на една етничка заедница, а Албанците само како внатрешен декор“.
Во соопштението ДУИ наведува дека Северна Македонија е мултиетничка држава и членка на НАТО, изградена врз принципите на еднаквост, соодветна застапеност и Охридскиот рамковен договор.
„Државните делегации треба да ја одразуваат реалноста на државата, а не да ја избришат“, наведуваат од ДУИ.
Според партијата, исклучувањето на Албанците од највисокото меѓународно претставување испраќа погрешна порака до граѓаните, до сојузниците и до самиот карактер на државата.
„Државата не е соодветно претставена кога половина од нејзината реалност е оставена надвор“, се наведува во партиското соопштение.