Усвоен е новиот Закон за игри на среќа и за забавни игри. Од министерството за финансии велат дека има за цел да обезбеди поголема заштита на граѓаните, особено на младите, да ја намали сивата економија, да ја зајакне контролата и надзорот врз приредувањето на игрите на среќа, да придонесе во борбата против перењето пари и финансиските злоупотреби и да создаде фер и транспарентни услови за работа на сите приредувачи.
Со овој закон за првпат се воведува критериум за оддалеченост на просториите за игри на среќа од најмалку 500 метри од основните и средните училишта. Се регулира и рекламирањето на игрите на среќа, односно се забранува рекламирање на надворешниот дел од деловните простории, како и користење светлечки и агресивни реклами.
Во делот на инспекцискиот надзор се прошируваат основите за одземање лиценци и дозволи, а се зголемува и висината на глобите за сторените прекршоци.