Државниот завод за ревизија откри сериозни пропусти во Министерството за односи меѓу заедниците за 2024 година.
Според ревизијата, во министерството недостигаат 30 лаптоп компјутери, за дел од вработените се исплаќале плати без да се провери дали навистина биле на работа, а нафтата за возила често се точела без никаква контрола дали автомобилите се во сопственост на министерството или во нечија приватна сопственост.
Основните средства и побарувањата од вработените се лошо евидентирани, што ја истакнува целосната хаотичност во управувањето, констатираа ревизорите.
Додаваат дека проблемите се прелеваат и во финансирањето на здруженија и фондации. Од 33 поддржани организации, повеќе од половина треба да вратат дел од добиените средства, бидејќи не доставиле докази за нивното користење.
Поголемиот дел од документите биле доставени на албански јазик, без превод на македонски, а програмата за финансиска поддршка била донесена со задоцнување – знак дека администрацијата едноставно не функционирала како што треба. Дури и јавните набавки се исполнети со чудни и сомнителни практики.
Сервисирањето на возила се наплатувало по неколку пати повисоки цени од понудените, дел од деловите не биле предвидени во договорите, а лиценците на фирмите кои учествувале во тендерите не биле проверувани.
Сите овие наоди ја ставаат во центарот на вниманието слабата контрола и недоследностите кои го дефинираат работењето на министерството во 2024 година.