Вест што ја пренеле македонските медиуми за апсолвентка која тргнала на екскурзија, се породила на Табановце, го оставила бебето во тоалетот и продолжила на екскурзија, ја вознемирила, но и ја инспирирала режисерката Косара Митиќ за нејзиното дебитантско долгометражно остварување „ 17“ , со кое ќе учествува во програмата „ Перспективи“ на Филмскиот фестивал во Берлин, следниов месец. Со Митиќ на сценариото работел и Хрватот со берлинска адреса, Огњен Свиличиќ. Според режисерката, филмот поставува прашање за колективната одговорност во врска со ваквите случаи.
- Филмот не се бави со давање одговори. Не се бави со обвинувања, не се бави со морализирање, тематизирање, туку се бави со кој е одговорен, односно кои луѓе, тишини и институции дозволиле такво нешто да се случи, вели Косара Митиќ, режисерка и косценарист на филмот „ 17“.
Главната улога на Сара ја толкува студентката од ФДУ, Ева Костиќ. Таа признава дека се исплашила од сложеноста на улогата.
- Бев изненадена кога дознав дека ќе ја играм Сара.Веднаш сватив дека е многу комплексен лик и малку ме плашеше тоа, искрено. Ама константно разговаравме со Косара, рече Ева Костиќ за ликот на Сара.
Улогата на нејзината другарка Лина и е доверена на дипломираната актерка Мартина Даниловска. Во филмот играат докажани актери, млади надежи на македонската кинематографија и натуршчици, а 20 од нив се млади луѓе. Ова е атипичен филм за нашата кинематографија, со поинаков пристап, вели продуцентот Томи Салковски.
- Значи од визуелен аспект, од креативен аспект, од актерски аспект малку е поразличен. Тука ја потрошивме нашата енергија, кажа Томи Салковски, продуцент на филмот од „ Црна мачка продукција“
Кинематографер е Наум Доксевски, а како копродуценти се вклучени и Србија и Словенија , „Синема нетврок“ и „Синелинк ворк ин прогрес“ .
Сотир Трајков