Катар го осуди Иран поради ракетниот напад врз американската воена база Ал Удеид на негова територија, нарекувајќи го „флагрантно кршење на суверенитетот“. Овој напад претставува очигледно нарушување на суверенитетот на Катар, спротивен е на принципите на добрососедски односи и е агресија врз меѓународниот легитимитет и меѓународното право“, изјави портпаролот на катарското МНР, Маџед бин Мухамед ал-Ансари.
Тој додаде дека Катар го задржува правото на одговор во согласност со меѓународното право, и повика сите страни да се вратат на патот на мирот и преговорите. Иран изврши ограничен напад врз базата како одговор на американското бомбардирање на ирански нуклеарни објекти, но посочи дека не сака натамошна ескалација.
Претседателот Доналд Трамп изјави дека нападот бил „многу слаб одговор“ и потврди дека САД биле однапред предупредени, при што немало жртви. Катар соопшти дека ги пресретнал сите ракети освен една, но не е јасно дали таа предизвикала штета.