Ова е исечок од една од пробите кои деновиве светски познатиот виолинист и диригент Џулијан Рахлин ги држеше со Македонската Филхармонија , во пресрет на концертот со кој што вечерва ќе биде отворено 64 издание на фестивалот Охридско лето, во Античкиот театар. Рахлин, кој во раните 90 -ти години на минатиот век и самиот учествувал на нашиот најголем летен фестивал, а во 2017 со Македонската Филхармонија настапи на Божикниот концерт во НОБ, овој пат на „ Охридско лето“ ќе има двојна улога. Ќе настапи како диригент и како виолинист, при изведбите на „Концертот за виолина и оркестар во Е- мол , опус 64“, од Феликс Менделсон и Увертирата – Фантазија „ Ромео и Јулија “, од Петар Илич Чајковски.Тоа за него и за музичарите од Македонската филхармонија е голем предизвик, вели Рахлин.
- За концертот на Менделсон за виолина, нормално имате солист, диригент и оркестар. Овде имате солист и диригент во едно. Па, оркестарот нема вистински диригент, што е многу возбудливо зашто секој музичар е дури многу поодговорен да слуша, да реагира. Па, тоа ќе биде многу интересно. Тоа е посебен предизвик за вас ? Да, тоа е голем предзвик . Но, не само за мене, исто така и за музичарите од оркестарот, вели Џулијан Рахлин, виолинист и диригент.
Пробите во Филхармонијата беа можност да се надминат сите технички предизвици при изведбата на делата. Имајќи предвид дека се работи за композиции од различни композитори , напишани во различни временски периоди, очекувањата се различни, вели концерт мајсторот во Македонската филхармонија, Ана Кондратенко.
- Во делото на Менделсон се бара , покрај романтика, и убави широки мелодии. Сепак, таму се бара според мене , од оркестарот се бара да биде поприбран, отколку во делото на Чајковски , каде што ние можеме да ја пуштиме душата, нашата словенска душа. Со големи наши вибрата , со голем звук кој што сум сигурна дека ќе го изведеме така, вели Ана Кондратенко, виолинист и концерт мајстор во Македонската Филхармонија.
На програмата на „ Охридско лето“ годинава има уште 26 музички, 5 драмски и 3 содржини во придружната програма, со учество на 500 уметници од 24 земји , како и од Македонија. Фестивалот трае до 20 август.
Сотир Трајков
