Во Охрид е уапсен еден избирач кој го сликал гласачкото ливче со телефон, соопштија од СВР Охрид. Досега имало вкупно 6 такви изборни инциденти кога гласачите ги сликале ливчињата.
МВР потврди дека двапати тоа се случило, во Скопје, а покрај Охрид, сликање на ливче било регистрирано и во Радовиш, Берово и во Штип.
Во Радовиш е забележано уште едно прекршување на тајноста на изборите кога гласач го покажал ливчето на набљудувач на политичка партија на избирачкото место.
„Покрај ова, на подрачје на општина Чаир во Скопје на паркирани возила забележани се летоци во врска со изборниот процес, а на две локации во Скопје се забележани испишани графити. На гласачко место во Скопје, покрај испишан графит, околу 06.30 часот е пријавено од страна на претседателот на избирачкиот одбор дека во ходникот била пронајдена испукана димна бомба. Од страна на полициски службеници се преземени потребните мерки и активности и гласањето се одвива непречено“ сооопшти Ангеловски.
МВР инаку оценува дека станува збор за мирен изборен ден.